أناشيد زوار الموقع - على كراسي الهم

على كراسي الهم ما بين جدران
جالس مع الدكتور وسط العياده

قال شبلاك وقلت لي عام تعبان
عايش على همٍ وضيق ونكاده

قال السبب قلت السبب دمع الاعيان
ابكي بليا ذنب وابغى السعاده

قال الفقر ثم قلت ما نيب فقران
قال الفلوس وقلت عندي زياده

قال زملاك وقلت خالد وسلطان
وأحمد وابو ناصر وزيد وعباده

قال السفر ثم قلت عديت وديان
واعرف سموم الجوف واعرف براده

قال الصلاة وقلت في بعض الاحيان
قال البلا معروف عندي الافاده

رح صلها وتشوف ما سر الاعيان
رح صلها وتشوف درب السعاده

يالله أنا عبدك وبي قوة إيمان
خايف لأموت وما نطقت الشهاده

خايف نهاراً فيه جنه ونيران
ناراً تخلي الشخص مثل الرماده

ابغى كتابي لا خذيته بالايمان
وابغى بياض الوجه ما ابغى سواده

يالله ياللي خالق الانس والجان
يا سامع النمله وصوت الجراده

ياللي شديد في الغضب وأنت رحمان
يا واحد يعلم خفايا عباده

اجعل حياتي دين وإيمان واحسان
وآخر كلامي في حياتي الشهاده