لأنك غالية - الوردة الثامنة: وعد العيون (2)
إزاي الواحد يحب حد ما يعرفوش؟ مش لازم الأول يعرف شخصيته وأخلاقه وعاداته.. مش هي دي الحاجات إللي بتتحب؟ وده إللي بتكتشفيه فعلاً بعد فترة لو بدأت علاقة ما بينكم، بتحسي إن فيه حاجة غلط؟ هو أنا حبيته ليه؟ مش ده الشخص إللي أنا كنت عايزاه!
بعد ما إتكلمنا عن الحب من أول نظرة قلتي إن الأحاسيس دي مش وهم..
هقولك: ومين قال إن الوهم بيبقى وهم فى قلب صاحبه؟!
الوهم شيء مش حقيقي؛ لكنه حقيقي وواقع عند إللي مُصاب به..
زي السراب! الإنسان العطشان لما بيبقى ماشي في الصحراء، بيشوف وكأن فيه مياه قدامه.. وبيبقى متأكد وشايف إنها واقع وحقيقة، ولكنها فعليًا وهم! وده نفس إللي بيحصل مع البنت إللي نفسها تحب وتتحب و(عطشانة عاطفياً).
هتقولي: أنا لسه برده مش مقتنعة!
هقولك جاوبي على السؤال ده علشان تتأكدي إنك انجذبتي له واتعلقتي به على مستوى البصر..
إزاي الواحد يحب حد ما يعرفوش؟ مش لازم الأول يعرف شخصيته وأخلاقه وعاداته.. مش هي دي الحاجات إللي بتتحب؟ وده إللي بتكتشفيه فعلاً بعد فترة لو بدأت علاقة ما بينكم، بتحسي إن فيه حاجة غلط؟ هو أنا حبيته ليه؟ مش ده الشخص إللي أنا كنت عايزاه!
وعلشان كده معظم علاقات الحب من أول نظرة -إن لم يكن كلها- بتنتهي بالفشل!
شوفي الكلام ده كمان، الكاتب الأمريكي (أريك جودمان) قال بعد إجراء بحث ميداني على مجموعة كبيرة من الشباب من الجنسين في المدارس الثانوية، وبداية المرحلة الجامعية في نيويورك: "أن الانطباع القوي الناجم عن اللقاء الأول بين الفتاة والشاب، والذي يطلق عليه الكثيرون اسم الحب من أول نظرة، يكون خداعاً في أغلب الأحوال"!
هتقولي: طيب الحل إيه؟! هقولك: الحل إنك بعد ما عرفتي حقيقة الحب من أول نظرة، لازم تفوقي من الكابوس إللي إنت معيّشة نفسك فيه، كفاية تعذيب في نفسك! لحد إمتى هتفضلي معلقة قلبك به؟ لحد إمتى هتفضلي تبصيله ويبصلك؟! ليه مش عايزة تلتزمي بأمر ربنا إللي أمرنا جميعاً ولاد وبنات بغض البصر..
قال تعالى: {قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ . وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا} [النور:30-31]، وإنتِ لو بتغضي بصرك من الأول مكنتش المشكلة إتوجدت من الأصل، ومكنش قلبك إتعلق بيه، وعلشان كده غض البصر أهم حل لمنع وعلاج مشكلة الحب من أول نظرة! ولو متعلقة به ومش قادرة تنسيه كملي قراية وهتعرفي الحل إيه.
- التصنيف: