الدين يسر

* الدين يسر؛ فيها أيه لما ألبس لبس شيك في الحجاب؟
- لأنه يسر اجعلي الشيك لبيتك، ولما تنزلي اضربي عباية على خمار في ثانية واحدة، أسهل صح؟

* الدين يسر؛ فيها أيه لما أضع مكياج وأنا نازلة؟
- يا حبيبتي الدين يسر، اجعلي صباع الروج للبيت، أو تحت النقاب عشان ما ينتهي بسرعة، وتروحي تشتري واحد جديد، وتدفعي فلوس كثير.
الدين يسر ما هيكلفك تدفعي فلوس كثير، الحمد لله.

* الدين يسر؛ فيها أيه لما أختلط وأقعد مع صاحب زوجي أو زوج صاحبتي؟ أو صاحبتي تقعد مع زوجي؟
- الحمد لله الدين يسر، لأجل هذا سهل على النساء وبعدهم عن الاختلاط، عشان ما يأتي زوجك يقولك دي صاحبتك "أحلى منك، أشيك منك، ..ألخ"، الدين يسر حفظلك زوجك، وريح قلبك، وحفظ لك علاقتك بصاحبتك، وعلاقته بصاحبه.
- الدين يسر؛ البسي أحلى لبس عندك، واقعدي مع زوجة صاحب زوجك أو صاحبتك، لوجدكم مش لازم تتكلفي الحجاب بعد يوم شاق من التنظيف وعمل الأكل.
- الدين يسر؛ ما مضطرة تدخلي في الغرفة اللي فيها أصحاب زوجك وتلبسي بقة، وتستقبليهم وكدة بعد يوم شاق من العمل، ممكن كمان تريحي ظهرك على ما زوجك ياخد قعدته.

* الدين يسر؛ فيها أيه لما أسافر من غير محرم؟
- يا عيوني يا غالية الدين يُسر؛ خليك في بيتك ومتتعبيش نفسك بالسفر أصلًا، حتى السفر تعب ومشقة وكلفة، العسر أنك تحضري شنطك وتشيليها على قلبك وتسافري.

* الدين يسر؛ عاوزة أشتغل وأعمل لنفسي قيمة، وبرستيج ويبقى لي ذات في المجتمع.
- والله فعلًا الدين يسر عشان كدة (مفرضتش) عليك تشتغلي، بالعكس ريحي واصحي براحتك، وعيشي حياتك، ومفروض على محرمك يصرف عليك.
والراجل هو المفروض عليه يشتغل، ومش من حقه يريح.

* الدين يسر؛ فيها أيه لما ألبس فستان سواريه عريااااان في فرح أدام النساء؟
- الدين يسر فمفيش داع تشتري فستان عرياااااااان؛ حتى بيكون غالي أوي، ممكن فستان سواريه شيك مش عريااااان.
لأنه الدين يسر فمش لازم تثيري غيرة وحسد أصحابك بجمال جسمك.

* الدين يسر؛ فيها أيه لما أسلم على الرجال بيدي؟
- يا قلبي الدين يسر بدل ما تمدي إيدك وتسلمي على راجل دفيها في جيبك، خصوصًا الدنيا ساقعة.
ده حتى عشان أمد إيدي فعل يعني محتاجة شغل وحركة، ومعروف في الفيزياء أن السكون أسهل من الحركة.

* الدين يسر؛ فيها أيه لما أعمل البدعة دي؟
- يا قلبي الدين يسر كبري دماغك ومتتكلفيش عملها أصلًا، السنة أسهل وأيسر والله اللهم لك الحمد.

(*) الدين يسر وكل الي بيقولوه عشان يعملوا شيء مخالف للشرع تحت عنوان الدين يسر هو في الحقيقة العسر والتشديد، مهما بدا غير ذلك.
فقط أنتم نظرتكم للمسألة من زاوية ضيقة.
زاوية رغبتي وهوايا عاوز أيه؟
لو الشرع وافق هواي يبقى يسر، لو هواي تعارض مع الشرع يبقى كدة عسر، انقلاب مفاهيم.
الصواب: أن الدين نفسه هو هو اللي يسر، وأن كل هوى عسر، وكلفة ومشقة، فقط الشيطان بيزينه لك، ويحسسك أن اليسر في هواك.