حكايات قبل النوم - حدوتة المسدس المفلس
حدوتة توضح قيمة العمل، وضرورته في الحياة..
حدوتة المسدس المفلس (حكاية للأطفال فوق سن 3 سنوات تعلم الأطفال عد الأرقام وقيمة العمل):
كان وياما كان، ولا يحلى الكلام إلا بذكر الله والصلاة على النبي عليه الصلاة والسلام..
كان فيه مسدس عنده ست رصاصات، واحد، اتنين، تلاتة، أربعة، خمسة، ستة، كان يحارب الأشرار ويضرب عليهم نار تاتاتاتا واحد اتنين... ستة.. الرصاص خلص ومش معاه فلوس.. يعمل إيه؟ لازم ينزل يشتغل عشان يكسب فلوس.. بس يشتغل إيه؟
المسدس مصنوع من إيه؟ المسدس مصنوع من الحديد ممكن يشتغل شاكوش..
راح للنجار قاله أنا مسدس من حديد من غير رصاص وعايز أشتغل ممكن أشتغل إيه؟
قاله ممكن تشتغل شاكوش تدق المسامير.. كل مسمار بجنية، قعد يدق مسمار اتنين.. ستة.
كل مسمار بجنية فكسب ستة جنية، راح اشتري ست رصاصات ورجع يحارب الأشرار ويضرب عليهم نار..
الرصاص خلص وفلوسه خلصت! يعمل إيه؟ لاااازم يشتغل.. راح للنجار لقاه قافل!
راح للحداد قاله أنا مسدس من حديد من غير رصاص ممكن أشتغل؟
الحداد قاله ممكن آخد منك كل يوم حتة أسيحها وأعمل منك مسامير وأديك فلوس كتير!
قاله لأ أنا مهمتي أحارب الأشرار، ولو بعتلك حتة من نفسي أبقى مسدس مكسور، لا أصلح للعمل ولا أقوم بمهمتي في محاربة الأشرار!
راح للفلاح قاله أنا مسدس من حديد من غير رصاص، وعايز أشتغل عشان أكسب فلوس وأشتري رصاص أحارب الأشرار.. قاله ممكن تشتغل معايا أخوف بيك الذئب اللي بياكل الفراخ، وتاخد كل يوم جنية!
قاله ياااااه ااشتغل أسبوع بحاله عشان أكسب ستة جنية! قال الأمر لله..
وافق يشتغل ويصبر عشان يحوش الستة جنية وفات يوم واتنين.. ستة، قدر يحوش الستة جنية..
وراح اشترى ست رصاصات ورجع يحارب الأشرار ويضرب عليهم نار.. واحد، اتنين، تلاتة، أربعة، خمسة، ستة، الرصاص خلص والأشرار لسه ما خلصوش!
وتستمر الحكاية إلى ما شاء الله لكن المسدس عرف إنه لازم يشتغل، لأن الشغل ضروري عشان يقوم بمهمته.
- التصنيف: