حكايات الحاجة - مدارس لغات

منذ 2015-05-07

لو المناهج أمريكية أو بريطانية وكدة ناقشي ولادك باستمرار، وفهميهم الصح والغلط والفرق بينا وبينهم، واغرسي فيهم العزة، اطلاع الولد على ثقافة تانية مفيد جدًا لكن من باب الاطلاع مش الهزيمة النفسية والتبعية.

معنديش أي مانع أنك تدخلي ابنك مدارس ياخد فيها الرياضيات والعلوم بالإنجليزي بس بشرط..
أقصد شروط:

- أنه يكون نيتك مش منظرة وتفاخر، وعندك هزيمة نفسية ومش عاجبك لغتك.
- أنك تعلميه يعرف كل الحاجات والمصطلحات بالعربي، ويكون عنده قدرة يشرحها بالعربي، سهل جدًا لو بيتعلمها في المدرسة بالإنجليزي يترجمها عربي، لأنه ببساطة دي لغته الأم، ويعرف الاثنين مش يبقى خواجة، ميعرفش يعني إيه جمع وطرح وقسمة.

- أنك تقوي لغته العربية -ولغتك الله يكرمك بالمرة-، مش عشان هو مدارس لغات يبقى تكتبي لي الذال زاي، والثاء سين وخراب اللغة، وتتكلمي نص كلامك عنجليزي وتكتبي فرانكو.. لا يا حبيبتي مش ده قصدي ولا أقره، ولا يعجبني الشغل ده مش لعبة.

- لازم تظهري له اعتزازك باللغة العربية، وفخرك بها، وتحاولي تعلميه شعر وتدوروا سوا على معاني مفردات فصحى، والتفسير وكدة..

- يحفظ القرآن، متقوليش أوه لا لا صعب يحفظ ده في مدارس لغات، هو مش صعب ياخد الماس والساينس بالإنجليزي، لكن صعب يحفظ؟! هزلت، ربنا قال: {وَلَقَدْ يَسَّرْنَا الْقُرْآنَ لِلذِّكْرِ} [القمر:17،22،32،40]، لكن مفيش آية في الساينس والماس أنهم متيسرين!

- احنا بنعلم عيالنا تعليم كويس عشان أمتنا ترتفع وترتقي، تنافس وفي يوم من الأيام هنحط احنا المناهج وهنعملها عربي، وهنسمي المخترعات بالعربي عشان احنا اخترعناها، مش بنتعلم لغات عشان نتفرنج ونبيع دينا، ونبقى زيهم لسان معوج وحال معوج!

- اهتمي بدينك وعلمي ولادك دينهم كويس وخليهم دايما معتزين بالدين ومقدمين الدين على أي شيء تاني.
- لو المناهج أمريكية أو بريطانية وكدة ناقشي ولادك باستمرار، وفهميهم الصح والغلط والفرق بينا وبينهم، واغرسي فيهم العزة، اطلاع الولد على ثقافة تانية مفيد جدًا لكن من باب الاطلاع مش الهزيمة النفسية والتبعية.

- أنا في كل ده بتكلم على مدارس لغات وبيئة مناسبة إلى حد ما، مش داخل في كلامي أبدًا مدارس التبشير والراهبات والرهبان عن تجربة، أرفضها.

المصدر: خاص بموقع طريق الإسلام
  • 2
  • 0
  • 1,354
المقال السابق
هلوسة عقلانية (3)
المقال التالي
ملحوظات مهمة جدًا عشان رمضان

هل تود تلقي التنبيهات من موقع طريق الاسلام؟

نعم أقرر لاحقاً