الدعاء سِحر (1-3)

منذ 2015-06-27

أنا وحش! ادعي، أنا مقصر! ادعي، أنا مكروب! ادعي، أنا مخنوق! ادعي، أنا محتاج! ادعي، ده مستحيل! ادعي برضه! وكل واحد فينا حصلتله (معجزة) هو عارفها كويس كانت بسبب دعوة صادقة (بحُرقة)، دعوة بيقين في كرم ربنا ورحمته.

 

عندك مشكلة؟ الدعاء سحر..
أنا وحش! ادعي، أنا مقصر! ادعي، أنا مكروب! ادعي، أنا مخنوق! ادعي، أنا محتاج! ادعي، أنا محتاس! ادعي، ده مستحيل! ادعي برضه! وكل واحد فينا حصلتله (معجزة) هو عارفها كويس كانت بسبب دعوة صادقة (بحُرقة)، دعوة بيقين في كرم ربنا ورحمته.

اطلبوا من ربنا الملك اللي خلقنا وأوجدنا من العدم، ورزقنا من قبل ما نعرف يعني إيه دعاء أصلاً! هو الرزاق ذي القوة المتين اسألوا الله بما هو أهله، مش بما نحن أهله! وإلا ما يبقاش فيه حد يستاهل أصلاً الاستجابة إلا من رحم ربي! واحفظوا الحديث القدسي الجميل ده، اكتبوه وعلقوا الورقة بحيث يكون دايمًا قصاد عنيكم في البيت، وفي الشغل وفي العربية..

عن أبي ذر الغفاري رضي الله عنه عن النبي صلى الله عليه وسلم فيما يرويه عن ربه عز وجل أنه قال :
«يا عبادي إني حرمت الظلم على نفسي وجعلته بينكم محرمًا فلا تظالموا، يا عبادي كلكم ضال إلا من هديته، فاستهدوني أهدكم، يا عبادي كلكم جائع إلا من أطعمته، فاستطعموني أطعمكم، يا عبادي كلكم عار إلا من كسوته، فاستكسوني أكسكم، يا عبادي إنكم تخطئون بالليل والنهار، وأنا أغفر الذنوب جميعًا، فاستغفروني أغفر لكم، يا عبادي إنكم لن تبلغوا ضري فتضروني، ولن تبلغوا نفعي فتنفعوني.. 

يا عبادي لو أن أولكم وآخركم وإنسكم وجنكم كانوا على أتقى قلب رجل واحد منكم ما زاد ذلك في ملكي شيئًا، يا عبادي لو أن أولكم وآخركم وإنسكم وجنكم كانوا على أفجر قلب رجل واحد ما نقص ذلك من ملكي شيئًا، يا عبادي لو أن أولكم وآخركم وإنسكم وجنكم قاموا في صعيد واحد فسألوني فأعطيت كل إنسان مسألته ما نقص ذلك مما عندي إلا كما ينقص المخيط إذا أدخل البحر، يا عبادي إنما هي أعمالكم أحصيها لكم ثم أوفيكم إياها، فمن وجد خيرا فليحمد الله، ومن وجد غير ذلك فلا يلومن إلا نفسه» (أخرجه مسلم في صحيحه).

خللي بالك؛ الأصل فينا الضلال، الأصل فينا الجوع، الأصل فينا الفقر، الأصل فينا المعصية كلنا ضال إلا من هداه الله، فاسألوا الله الهداية، كلنا فقير فاسألوا الله الغنى، كلنا عاصي فاسألوا الله المغفرة، كلنا محتاج فاسألوا الله، بس كده ببساطة.

لو خزائن ربنا سبحانه وتعالى بحر واحنا جينا نغرف من البحر ده مش بمعلقة، لأ بإبرة! عارف إبرة الخياطة لما تيجي تدخلها البحر هتطلع بإيه؟ بذرة ماء في خرم الإبرة، يعني أقل حتى من قطرة ماء، أهي الذرة دي تغرقنا كلنا، إنس وجن، حتى لو كل واحد طلب ملايين، مليارات، فلوس، صحة، علم، عيال، آخر ما طمعك يجيب معاك.. 

يبقى احنا اللي بنبخل على نفسنا احنا اللي بنضيق على نفسنا وسع.. 
{وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ} [البقرة:186]

 

المصدر: خاص بموقع طريق الإسلام

ريهام فوزي

كاتبة إسلامية

  • 5
  • 0
  • 7,392

هل تود تلقي التنبيهات من موقع طريق الاسلام؟

نعم أقرر لاحقاً