المشهد الأخير للرئيس والفشَّار

في أثناء سهري في الجريدة وبعد تمام الساعة الثانية من منتصف ليلة أمس حدثتني نفسي بضرورة محاكمة قادة الإعلام والصحافة الحكومية خلال حكم الرئيس المخلوع حسني مبارك بتهم تضليل الرأي العام مع سبق الإصرار والترصد، وإفساد مؤسساتهم الإعلامية والصحفية، ليس ذلك فحسب بل إفساد وتضليل شعب مسالم بأكمله، مع ممارسة الدعارة السياسية والإعلامية لجعله مسخا يسيطر عليه اليأس والإحباط ليعيش في ظلام دامس وتعتيم متعمد لمصلحة رموز الفساد، حتى اختملت في رأسي فكرة أن وجودهم فى المجتمع من الآن فصاعدا يشكل خطورة شديدة علي مجتمع حر وليد ناشئ يسعى إلى الإصلاح، شعرت بالإرهاق الشديد من كثرة التفكير، وفجأة انقطع النور للحظات وعاد ثانية فرأيت الجريدة كلها قد زرعت بعساكر وقوات خاصة ففزعت قلت:

"يااه أكيد جايين يقبضوا عليا علشان ملتحي أو شافوني في المظاهرات وأنا مميز كده وطويل"، لكن لاحظت أن العساكر لا تلحظ وجودي كأنهم منشغلون بشيء أهم فقمت من على المكتب ومشيت حتى الباب الرئيسى وقلت أفلت بجلدي، وعندما وصلت إلى الباب الرئيسى شاهدت السيد الرئيس محمد حسني مبارك ينزل من سيارته وأمامه التشريفة، بصراحة دمي هرب قلت معقولة ايه اللي رجعه تاني..

وجاي بنفسه علشان يقفشني ومعه حرسه الجمهوري، واتكررت المفاجأة فلم يشعر بي أحد، صعد الرئيس إلى الدور الرابع فتجلدت وسرت وراءه ودخل على "قصر الضلالة" رئيس التحرير، فوجد سكرتيرته "الحاجة" التي تدير الجريدة وتتحكم في رقاب العباد لضعف شخصية "قصر الضلالة" وجدها تكتب كشوف الحوافز والتعيينات والترقيات وبتمضى "قصر الضلالة" عليها وقالت له "فلان ده كان مع الثوار في الميدان علشان كده حطيتو رئيس قسم الأخبار علشان نهدي الجو قالها برافو عليك كنت هقول كده، وايه كمان قالت ده كشف بالناس اللي بيكتبوا من الحزب امضى علشان نريحهم شوية.


قال برافو عليك كنت هقول كده برضوه، قالت الحوافز هتكون زي العام الماضي مع زيادة للكل ورجالتنا ليهم "أظرف البركة" بس من غير ما حد يعرف وإياك لسانك يفلت المرة دي..

برافو كنت هقول كده برضوه، في هذه اللحظة اقتحم الرئيس مكتب "قصر الضلالة" مثل الأسد الغضنفر وشخط زي زمان ايه اللي عملته ده يا حمار ازاي تكتب ان الخونة أصحاب ثورة، وثورة شريفة وتكتب عليا الرئيس السابق.. وأن الحكومة جمدت أموالي اللي قعدت أحوش فيها 30 سنة من عرقي وعرق المصريين ، اتفزع "قصر الضلالة" ونط وقف أمام الرئيس مش عارف يرد خاف على المليون وربع "مصروفه الشهري" من دم الشغالين فى المؤسسة، لكن غمزتله سكرتيرته "الحاجة" فهدأ وقال "يا ريس أنا طول عمري وطني وعمري ما كتبت كده.. اللي وصل لك المعلومات دى كداب وابن كداب عايز يشوه صورتي عند جلالتك، ده أنا عمري ما أرفع راسي في ولي نعمتي دا انت فضلتني على كل رؤساء الصحف لما اتصورت وانت عيان في ألمانيا وانت ماسك جريدتك بتقرأها، صحيح كنت بتقرأ الإعلان اللى في الصفحة الأخيرة، بس اطمن سعادتك ما فيش حد عارف كان فيها ايه، وده نيشان على صدري.. وخاطب "قصر الضلالة" سكرتيرته "الحاجة" قائلا بانفعال: شوفي مين الواطي اللي كتبلي انهارده؟ فقالت فلان..

فقال: تمام يا ريس فصلناه طلع واحد من الخلايا النايمة، فقال الرئيس تفتكر مين عايز يوقع بيني وبينك؟

قال رئيس التحرير: أكيد واحد من ولاد الكلب اللي كانوا في التحرير، دانا كنت لسه كاتب مانشيت بكرة بقول إنهم قلة مندسة وعملاء للصهاينة وليهم أجندات خارجية مش مطبوعة في قليوب، ولا في كوبري القبة ولا في لاظغلي، وأكبر دليل إنهم بيكلوا هوت دوج، فقال الرئيس بس فيه واد في الجريدة التانية بتاعتي كتب إنهم بيكلوا كنتاكي، فقال قصر الضلالة : ماهو ده يثبت لسيادتك قد إيه أنا بفهم سياسة، لو قلت بياكلوا كنتاكي ده ممكن يزعل مننا الأمريكان ويحرموا سيادتك من المساعدات ويحرموا مركز الدراسات عندي من الدعم، وكذلك بعض زملائي في الصحف الأخرى أما أنا فمتبرع بالمبلغ لسداد ديون مصر الخارجية اللي وصلت في عهد سيادتك إلى 33 مليار دولار..

شوفت يا ريس أنا قد ايه نِوِرْ وسياسي ووطني، هز الرئيس رأسه وسكت، فتابع كلامه: وبعدين أنا كتبت إنهم بيكرهوا البلد وضد الاستقرار وسايقهم شوية منتفعين، اللي عايز يشتري محافظة من سيادتك أو اللي طمعان في شاطئ أو جزيرة من خير سعادتك أو واحد عايز يحتكر السيارات أو الحديد بتاع سيادتك أو مناجم الذهب بتاعة جنابك، أو نفسه في احتكار تجارة السلاح بعد ما العادلي اتقفش، كلهم منتفعين ومش وطنيين، والله يا ريس لو تشوف أنا امبارح كنت عند "أنوس" في التليفزيون بقوله على خطة توعية الرأي العام بأهم إنجازات سعادتك، وطلبت منه نعمل اجتماع عاجل مع رؤساء الصحف الوطنيين أمثالي وعمال التليفزيون بعد ما يصرف لينا كلنا "مكافأة هتف"، ونهتف ونقول "عاش الرئيس..


عاش الرئيس" في التليفزيون، يا ريس دانت الوحيد اللي بيلبس كرفتات أنا مبعرفش أجيبها معي أن سيادتك عارف عقدتي في الكرفتات حتى في كل سفرية لازم أشترى تسع كرفتات، دا أنا ساعات بنام بيها، علشان أبقه شيك قدام الملائكة في الحلم، ما حضرتك عارف المظهر بيخبي وراه أشياء كتير وزي ما علموني المخبرين لازم أكون شيك، بس طبعا عمري ما هوصل لشياكة سيادتك، دا أنا من حبي في الشياكة عينت واد بعد شهر من تدريبه علشان بيلبس كويس، وساعتها قلة مندسة ماتت من الغيظ شوية عيال علشان بقالهم 10 سنين بس بيتدربو، لكن أغبياء مش عارفين سياسة الجرنال أعمل إيه أغبياء فاكرينها سايبة، سيادتك لو زعلت مني أنا أمسح جزمتك بلساني.. هدأ الرئيس وجلس على كرسي قدمته له السكرتيرة "الحاجة"، وظل "قصر الضلالة" واقفا ، قال له الرئيس ايه أخبار الناس عندك، أجاب "قصر الضلالة" كل تمام يا ريس كل الصحفيين والعمال عندي بيبوسوا ايديك وأنا خدت قرار إن كل اللي هيتظبط وهوه مروح ويعدي على التحرير ولو في المترو يقدم للتحقيق ويفصل بتهمة التخابر مع الأعداء ، قال الرئيس طيب واللي في التحرير كان عددهم قد إيه؟

أجاب "قصر الضلالة" : دول قلة مندسة زي "تمورة أبو روج" ماقال في برنامج إمبارح، طيب همه فين دلوقتي، قال رئيس التحرير : الجيش اعتقلهم كلهم وفتح ليهم جوانتانامو في الصحراء الغربية علشان يلعبوا مع الكهربة والكلاب السعرانة، ويعمر بجثثهم الصحراء، فسأله الرئيس طيب تفتكر ايه الخطة اللي جاية؟

فقال "قصر الضلالة" لازم يا ريس نلعب على وتر العاطفة، دوخة، إغماء ، مستشفى، اكتئاب، وبعدين نحاول نفرق بين الأعداء لأنهم أصلا من كل صنف ولون، ولمح بطرف عينيه جريدة أمس فأصابه الفزع ونظر لـ"الحاجة" ففهمت بسرعة ما يريد وقالت تشرب إيه سيادتك قهوة ولا حاجة ساقعة ولفت الجريدة تحت باطها وخرجت بسرعة وعادت ومعها فنجان قهوة على الريحة زي الرئيس ما بيحب، قلت لنفسي معقولة هتخيل على الرئيس بالسرعة دي، لكن تذكرت إن الرئيس تجاوز الثمانين وكبر وكان في غيبوبة مرض بعد ما اتخلع، وبعدين هوه عايز يسمع كده مع انه عارف حقيقة "قصر الضلالة" ثم دخلت السكرتيرة الحاجة بالقهوة لكن تعثرت في السجادة فوقع الفنجان على ملابس الرئيس، فتنبهتُ فزعا إلى أن رأسي آلمتني من مكتبي الخشبي وأخذت أحك عيني بيدي من الإرهاق الشديد ثم ناديت على الساعي ليحضر لي كوبا من الشاي، وبعين متثاقلة من أثر النوم رأيت مانشيت عدد الغد بإمضاء "قصر الضلالة"
"الشعب أسقط النظام"
"شباب مصر أجبر مبارك على الرحيل".

فقلت سبحان القائل: {وَقَالُوا رَبَّنَا إِنَّا أَطَعْنَا سَادَتَنَا وَكُبَرَاءَنَا فَأَضَلُّونَا السَّبِيلَا . رَبَّنَا آتِهِمْ ضِعْفَيْنِ مِنَ الْعَذَابِ وَالْعَنْهُمْ لَعْنًا كَبِيرًا} [الأحزاب: 67 - 68]..
الحمد لله راح رأس الفساد ولكن لم يذهب منافقوه بعد؛ لأنهم ببساطة منافقون لكل العصور، إيدك في إيدي نطهر بلدنا ونبنيها من تاني.


27-02-2011 م