البخاري (3)

- يا بنتي محدش معصوم..
البخاري زي الفل بس مش معصوم وبالتالي ممكن يبقى في كتابه غلطات يعني..
وحتى لو كتابه مخدوم وكدة وثبت أنه كله صحيح بس مين يقولنا أن الراوي مغلطش؟!

- طيب يا حجة أنت بس مشكلتك أنك مش فاهمة ولا متصورة يعني إيه أمة الإسلام أمة الإسناد..
الحديث عشان يكون صحيح أصلاً لازم يكون سنده متصل.. يعني واحد يروي الحديث عن واحد.. لحد الصحابي عن النبي، ولازم الناس اللي نقلته دول يكونوا ضابطين للحفظ.. وبيختبروهم على فكرة، ولازم يكونوا ثقات وأهل عدالة وديانة..

وفيه علم كامل اسمه (الجرح والتعديل) عشان يتكلموا عن كل راجل تصدر لرواية الحديث، بينقلوا عن أخلاقه وحفظه كل كبيرة وصغيرة، لدرجة أنه لو كان حافظ وبعدين حفظه ضعف يقولك حفظه تغير بعد سن كذا، وبيجمعوا الشيوخ وتلاميذهم بحيث لو واحد حافظ وثقة خالف في الرواية ناس كثير أو شخص أكثر ثقة منه أو أشد حفظ.. يقولك روايته دي شاذة متنفعش.

عشان كدة ضمن تعريف الحديث الصحيح بنقول: "من غير شذوذو ولا علة".
والجملة دي فيها علم كامل ضمن علوم الحديث.. البخاري كان أستاذ الأساتيذ فيه، كما قال تلميذه مسلم، ومش هنحكي على سفرهم عشان تأكيد حديث ونفيه، كانوا بينبشوا الصخر مش قاعدين في التكييف..

بالعربي العلم ده لو عند أوروبا والدول المتقدمة كانوا افتخروا بيه وصدعونا.. مش زي السفهاء إللي بيهدوا جهد مبهر زي ده! وصحيح البخاري بالذات شرط البخاري فيه شرط خلا الكتاب أصح الكتب المصنفة.