حضرة المرحوم -بإذن الله- سيد بلال

حضرة ضحية مشروع الصليب ضد الهلال
في الحقيقة باعترف إني جبان
خايف ومرعوب من قوة السجان
سيد بلال: خليني أقولك إنك وراك عيال
ماتت شهامتهم ورجولتهم من زمان
صعب الكلام ده؟ مرة الحقيقة؟
لكن الحقيقة أهو دا اللي كان!!
سيد بلال أنا واحد من كدابين الزفة
ممكن أجعجع، أكتب مقال، أخطب لي خطبة
وساعة الحقيقة أستاذ في خطة الزوغان
يا سيد سيد بلال عوضك على الله في أخوة الإسلام
تسألني فين الرجال؟
البعض ماتوا، والبعض ضاعوا!
والبعض باعوا رخيص حور الجنان!
صورتك وأنت ميت بتضحك بتهدني هد
بتقولي آن يا جبان خلاص أوان الجد
خلي جسور العبور للخلاص تتمد، آن الأوان
بشوف في صورتك مع ابنك
نفسي مع ابني في لحظة الروقان
صورتك يا سيد طيرت النوم من عينيا،
سامعك طول النهار والليل بتنده عليا
ذنبي إيه؟ قتلوني ليه؟
وأنا إنسان مسالم حتى اسألوا عني الجيران
ياعم سيد اللي زيي وزيك مالوش حق السؤال
يمين يمين، شمال شمال، ذل وهوان
موتك دبحني، موتك مسحني،
صحي الحقيقة العاصية على النسيان
موتك جريمة، فظيعة وأليمة، جديدة وقديمة،
ومع ذلك رفضي ضعيف بهتان
أطمن يا سيد: تارك في علم الواحد الديان
سبحانه عالم بعملة السجان
ولحظة ما ييجي قضاه يا ويله من لحظة الأَخَدان
قول للي قتل سيد وغير سيد
خدلك يومين، خدلك ثلاثة
غفلة مهما طولت
مسيرها جاية لحظة الفوقان
كل حاجة عليك متسجلة
والمحاكمة ماعمرهاش متأجلة
بس كل حاجة بوقتها،
تقل ميزانك واظلم كمان
آسف يا سيد
ما ملكش غير دمعي ودعوة بظهر الغيب
إني في يوم أبقى جريء وماموتش شخص جبان

Kaledshafey@yahoo.com