شكرا مبارك (شعر بالعامية المصرية)

شكرا مبارك

شكرا مبارك ع العقود اللي قضيتها ف حكمنا

وبرضه شكرا ع العقود اللي مضيتها بإسمنا

حسابات بنوك أودعت فيها مليارات من دمنا

وسبتنا واقفين طابور ع العيش بنقتل بعضنا

شكرا مبارك

شكرا مبارك ع الفساد اللي نهش في لحمنا

وتقول شفافية وكلام   ورم نفوخنا وودننا

وحاشية من حبة لصوص باعوا وطننا وأرضنا

يطلعونا معاش مبكر   وانت تحكم ميت سنة!!

ليه يا مبارك

ف ديون كتير غرقتنا   للأمريكان سلمتنا

بمعونة زلت نفسنا  وياريتها وصلت شعبنا

ماوصلش منها الا الرصاص

وغاز يسيل دمعنا

شكرا مبارك

من شرم سينا حرمتنا  وفاتحها لولاد عمنا

يبرطعوا خمرة وزنا  والغاز هدية مننا!!

وأما فلسطين يصرخوا تقول حدودي آمنة

ليه يا مبارك

سرطان مدمر ربعنا  والباقي أمراض مزمنة

وعشان علاجك يتصرف   يلففوك هنا و هنا

واما هتاخده تكتشف     إنه هوا عبوه لنا !!

شكرا مبارك

شككتنا  في  بعضنا   وهلال صليب فجرتنا

إعلام ضميره خصخصوه  حسسنا إنك ربنا

وإن يوم فتحنا بقنا    نبقى بنعلن كفرنا !!

شكرا مبارك

تعليم عقيم علمتنا    يدفن ذكاءنا وحلمنا

خرج شباب يعمل دماغ ويعيش مغيب عننا

واما إنتفض أمنك رفض وبالرصاص قتلتنا

شكراً مبارك

                           د. عبادة محمد سعيد