رداً على جمعة الوفاء (شعر بالعامية المصرية)

يا رب تكمل فرحتنا

إنجاز إعجاز       والجيش إنحاز       للحق و أيد ثورتنا

والشعب إن عاز    لا رصاص ولا غاز    ولا أمن هيقدر يكبتنا

والحرق إن جاز       فهيبقى بجاز      لعصابة باعتنا و سرقتنا

جابوا خيل وجمال      فاكرينا عيال      هنخاف ونروح على بيتنا

فتحوا الزنازين    خرجوا المساجين    والشرطة هربت وسابتنا

قاموا الجدعان          عملولنا لجان          شعبية وقفت وحمتنا

ده فساد كان ساد     والعيشة سواد     ومرارة حتى ف ضحكتنا

ظلمونا كتير       كدب و تزوير       وضرايب حتى على نومتنا

والمصري حمول      بس ان ثارغول      لازم هايرجع كرامتنا

أبطال ثوار      ماخافوش م النار       فتحوا لنا طريق حريتنا

و رفعنا الراس    ما الذل خلاص    والتحرير يشهد بطولتنا

    وأديني باقول     أنا مش مسئول     لو يوم مسئول خان أمانتنا

د.عبادة محمد سعيد

 ( كتبتها في الإثنين 21-2-2011 )