حكايات قبل النوم - حكاية الشجرة الطيبة

منذ 2015-04-08

بصبر ومثابرة تكبر شجرة زي أول شجرة زرعها أول راجل طيب بأمر الله، تشرب من مية المطر والفرع العوج تعدله برفق وحكمة وصبر، والفرع الفاسد تقطعه ولا تأمن للمفسدين ومكرهم حتى لو سقوها مية بعسل!

حكاية الشجرة الطيبة (حكاية للكبار والصغار):
كان وياما كان ولا يحلى الكلام إلا بذكر الله والصلاة على النبي عليه الصلاة والسلام..
كان فيه رجل طيب بأمر الله رزقه ببذرة طيبة زرعها في أرض طيبة، وكان الشرط يسقيها بمية المطر وبس..

خباها في الأرض وسقاها يوم ورا يوم سنة ورا سنة لحد أما كبرت وبقت شجرة قوية لها فروع وأوراق وثمر حلو.. الفرع المعوج يعدله بالرفق والحكمة والصبر .. والفرع الفاسد يقطعه، وكان العهد إن الشجرة ما تشربش غير من مية المطر!

مات الراجل الطيب وفضلت الشجرة على العهد تشرب من مية المطر..
سنين وسنين الشجرة كبرت وبقت شجرة ضخمة وعظيمة، وثمارها كتير وورقها أكتر!  
جم ناس أشرار عايزين الأرض، حاولوا يقطعوا الشجرة بالفاس ما عرفوش!  شجرة عظيمة وصلبة جدًا على الكسر!

قالوا الحل محتاج صبر ومثابرة!  إحنا نسكن جنبها ونسقيها بمية فاسدة، وهي مع الوقت هتسوس وتشيخ وتقع لوحدها!  العهد يا شجرة العهد العهد، ما تشربيش غير مية المطر!

سقوها بمية مسمومة رفضت، سقوها بمية مالحة رفضت، سقوها بمية فيها عسل قبلت وشربت!  بعد شوية خلطوا المية الحلوة بسم، دسوا السم في العسل!  بدأ ورقها يبقى أصفر!  شوية جذور حبت تصلح إللي حصل فشربت ملح افتكرت إن الملح يعالج السكر فذبلت!  نسيت العهد ؛ إن حياتها ودواها في مية المطر..

الشجرة سوست وشاخت ودبلت، وزقوها بس زقة وقعت واتكسرت فروعها، وانفرط ورقها وثمارها على الأرض، شوية وبذورها اتبدرت على الأرض، كتير منها بذور فاسدة، فسدت من تأثير السم، وشوية بذور لسه سليمة.. بذرة فاسدة يسقوها بمية ملوثة.. بعد شوية تبقى شجرة خبيثة فروعها معوجة وثمارها حنضل!  عالة على الأرض وخيرها!

بذرة طيبة يلاقيها راجل طيب يزرعها ويفتكر العهد ؛ ما تسقيهاش غير بمية المطر .. يزرعها والزرعة تكبر وبعد وقت تنسى العهد وتجاور تاني ناس مفسدين، وتشرب من مية ملوثة مختلطة بسم في العسل!
تسوس قبل ما تكبر!  وورقها يصفر وينفرط وثمارها الحلوة تقع على الأرض!  
طب والحل؟

الحل في البذور الطيبة تتعاهد على مية المطر، العهد العهد مية المطر وبس!
وبصبر ومثابرة تكبر شجرة زي أول شجرة زرعها أول راجل طيب بأمر الله، تشرب من مية المطر والفرع العوج تعدله برفق وحكمة وصبر، والفرع الفاسد تقطعه ولا تأمن للمفسدين ومكرهم حتى لو سقوها مية بعسل!

المصدر: خاص بموقع طريق الإسلام

ريهام فوزي

كاتبة إسلامية

  • 10
  • 0
  • 5,218
المقال السابق
حكاية بئر ماء المطر
المقال التالي
حكاية البطة وأرض الإسلام

هل تود تلقي التنبيهات من موقع طريق الاسلام؟

نعم أقرر لاحقاً