حكايات قبل النوم - حكاية الكرسي الشقي
حكاية للأطفال فوق سن سنتين تعلم الأطفال عد الأرقام والحرص..
حكاية الكرسي الشقي (حكاية للأطفال فوق سن سنتين تعلم الأطفال عد الأرقام والحرص):
كان وياما كان، ولا يحلى الكلام إلا بذكر الله والصلاة على النبي عليه الصلاة والسلام..
كان فيه كرسي شقي له أربع رجلين، واحد.. اتنين.. تلاتة.. أربعة..
كان يجري ويلعب ويتنطط وينط نطة كبييييرة.. قالوله بلاش تنط نطة كبيرة لاحسن تقع ورجلك تتكسر، ما سمعش كلامهم! وقعد يجري وينط جامد وفجأة وقع على رجله اتكسرت! بقى عنده تلات رجلين! واحد، اتنين، تلاتة.. والرابعة مكسورة!
قعد يعيط عشان رجله بتوجعه وقال الحمد لله قدر الله وما شاء فعل رب اغفر لي..
راح للدكتور إداله دوا وجبسله رجله وقاله ممنوع تجري ولا تمشي ولا تلعب لحد أما تخف!
قعد زعلان عشان محروم من المشي والجري واللعب والتنطيط..
قعد يستغفر ويدعي ربنا اللهم اشفيني.. وياخد الدوا لحد أما رجله خفت ورجع يجري ويلعب ويتنطط.. بس بالرااااحة وبحرص.، عشان يحافظ على رجليه الأربعة! واحد، اتنين، تلاتة، أربعة.. وما تتكسرش تاني.
- التصنيف: