أركان الثبات يقول الله تبارك وتعالى في سورة النحل " ثُمَّ إِنَّ رَبَّكَ لِلَّذِينَ هَاجَرُوا ...

أركان الثبات

يقول الله تبارك وتعالى في سورة النحل " ثُمَّ إِنَّ رَبَّكَ لِلَّذِينَ هَاجَرُوا مِنْ بَعْدِ مَا فُتِنُوا ثُمَّ جَاهَدُوا وَصَبَرُوا إِنَّ رَبَّكَ مِنْ بَعْدِهَا لَغَفُورٌ رَحِيمٌ " [ النحل : 110]
- من بعد ما وُضع السيف الناري على رأس خباب وهو بيصلي .. وفضل ثابت
- من بعد ما رُبط بلال في الخيل وجرجر على حر الرمل المتقد .. وفضل ثابت
- من بعد ما حُفر لخباب حفرة ووضع بها جمر ونام على هذا الجمر ولم يطفىء الجمر إلا شحم ظهره .. وفضل ثابت

الصفة دي يا إخواني إسمها " صفة الصمود "
الإنسان الصامد اللى مهما عملوا فيه هو مكمل على طريق الدعوة بتاعته
اللي مهما عملوا فيه هو مستمسك بهذا الطريق
اللي مهما أهل الباطل علموا هو ثابت على هذا الدين
من أعظم الصفات التي تُرى في الأنبياء والرسل والمؤمنين من بعدهم .. هي صفة الصمود ..

- الآية التي تجسد معنى " الصمود" هي قول الله عز وجل " يَا أَيُّهَا الَّذِينَ آمَنُواْ اصْبِرُواْ وَصَابِرُواْ وَرَابِطُواْ وَاتَّقُواْ اللّهَ لَعَلَّكُمْ تُفْلِحُونَ" [آل عمران : 200]
هو ده الثبات يا جماعة
عايزين تعرفوا يعني إيه ثبات .. هو ده التعريف الكامل والشامل للثبات

أولاً : اصبروا
الصبر هو الاستمرار
- إنك تفضل مستمر على العمل
- إنك تفضل مستمر على ورد العبادة
- إنك تفضل مستمر على الدعوة إلى الله
- إنك تفضل مستمر إلى أن تموت
كما قال النبي-صلّ الله عليه وسلم- للصحابة قبل موته : " اصبروا حتى تلقوني على الحوض"
استمروا على ما انتم عليه إلى أن تموتوا .. الصبر حتى الموت

ثانياً : صابروا
صابروا بمعنى الكفاح
- يعني إيه كفاح النبي-عليه الصلاة والسلام-
- يعني إيه مهما كانت المهمة صعبة يارب فأنا استقوى بك عليها ..
زي ما ربنا قال للنبي-صل الله عليه وسلم- في الأول " وَلِرَبِّكَ فَاصْبِرْ " [المدثر : 7]
أصل انت ياما هتشوف !
" ولا تمنن تستكثر " [ المدثر : 6]
أصل انت ياما هتضحي ..
الكفاح
- إنك تكافح لحد ما الشباب واحد واحد يتوب لربنا
- إنك تكافح لحد ما القرآن آية آية تفهمها
- إنك تكافح لحد ما الأمة كلها تتحرر من كبوتها

ثالثاُ : رابطوا
المرابطة بمعنى الصمود
الصمود
- إن لو أهل الباطل جاءوا ليقتلوك فأنت واقف على طريق الدعوة مهما حصل
- إن لو أهل الباطل عملوا أيه .. فأنا واقف على الطريق ده .. لا يمكن أتركه ..
الصمود في دين الله
قف على الثغر .. لو قٌتلت خليك واقف على الثغر ,, لأن الثغر لو اتفتح فالدين هيؤتى من قبلك أنت

رابعاُ " اتقوا الله
- اياك تصبر وتصابر وترابط عشان يتقال عليك بطل
-اياك تصبر وتصابر وترابط عشان عرض من أعراض الدنيا
انت هتصبر وتصابر وترابط لأنها قضية جنة أو نار

قضية الثبات يا إخواني هي قضية جنة أو نار
- قضية الثبات يعني واحد كان عداد حسناته شغال ليل نهار ، فانتكس .. فبقى عداد سيئاته شغال ليل نهار
- قضية الثبات يعني واحد كان ماشي في طريق كله ملائكه ، فانتكس .. فمشى فطريق كله شياطين
- قضية الثبات يعني واحد كان هيدخل الجنة ، فانتكس .. فبقى مستنيه حفرة من حفر النيران تحت التراب

عشان كده " واتقوا الله"
اعرف انها قضية جنة أو نار ..
لأن لو اصبروا وصابروا ورابطوا فقط .. فهيبقى إيه الفرق بين أي جندي من جنود الله وبين أي واحد تاني بيصبر ويصابر ويرابط في طريق الباطل

- " واتقوا الله" الركن ده من أركان الثبات الأربعة فرق ما بين البطل اللي عايش عشان ربنا .. والبطل اللي عايش عشان أي عصبية أخري ..

- إذاُ .. فالثبات له أركان أربعة وهم :
1. اصبروا = الاستمرار
2. صابروا = الكفاح
3. رابطوا = الصمود
4. اتقوا الله = هي لله


كتبه الفقير إلى عفو ربه
بلال العربي