إلا صلاتي

منذ 2015-03-28

رسالة مباشرة عن الصلاة بالعامية بصيغة المخاطَب ليقرأها الأطفال والشباب..

إنت بتصلي؟
حاسس بالصلاة؟
فرحان بيها؟
لامس نتيجتها في حياتك؟
لو أي سؤال من دول إجابته "لأ"، يبقي اقرأ معايا كدة وراجع نفسك..

إنت عارف يعني إيه "يلا نصلي"؟
يعني يلا يا مسلم نكلم ربنا(1)
يعني يلا يا مسلم نرتاح بقا بين إيدين ربنا.. وننور حياتنا بنور ما بيقطعش!..
هتقول لي "وإزايبقا صلاتي تنور حياتي!؟ دة هما يادوب خمس دقايق خمس مرات في اليوم!!"....
تعالى نجرب نصلي سوا دلوقتي.. واحكم بنفسك..

تعالى نبدأ الأول وننزل ذنوبنا في الحوض بالمية عشان نبقى "أبيض ف أبيض" قبل ما نقف قدام ملك الملوك.. لقاء رفيع المستوى..

إنت عارف إن زماااااان الواحد من السلف بعد ما كان يتوضأ كان بيترعش وهو داخل على الصلاة، فيسألوه مالك بتترعش كدة ليه؟! يرد يقول: "إنتوا مش عارفين أنا هقف بين إيدين مين دلوقتي؟!"...

خلصت وضوء خلاص؟ وثبِّت على دراعك ورجلك ووشك النور إللي هييجوا منورين بيه يوم القيامة إن شاء الله؟ تمام جدا...

خد بالك بقا وركز..

إنت عارف إحنا داخل فين دلوقتي؟ في منطقة حرام..

يعني ممنوع فيها أكل وشرب وضحك وأي كلام إلا الذكر.. هتقف بين إيدين ربك إللي خلقك في الدنيا دي.. مجرد ما تقول: "الله أكبر" وتزؤ الهوا بإيدك ورا ودانك تخيل نفسك بترمي الدنيا كووولها بضهر ورا ضهرك.. كووول الدنيا..

طب عارف يعني إيه الله أكبر؟ يعني مفيش أقوى منه ولا أرحم منه ولا ألطف ولا أعظم ولا أوسع ولا أجودولا أقدس ولا أعز ولا أعلم ولا أحكم ولا أعدل ولا أعلى منه، ولا أشد منه جبروتًا وانتقامًا وبطشًا وقهرًا ونفعًا، كوووول شيء هو سبحانه الأكبر فيه، كل شيء من إللي ربنا أثبته لذاته في القرآن والأحاديث الصحيحة.

يلا اطفي أي دوشة وابعد عن أي ملهيات..
هيأ نفسك يا مسلم للقاء الجبار الرحيم العظيم الحليم.. الكرييييم..
اختار براحتك أيمكانفي البيتبتحب تصلي فيه بسكينة، لحد ما تتجدعن كدة وتروح المسجد بقا مع الرجال..

وقبل الصلاة اختار السُّوَر إللي تحب تمررها على قلبك عشان ترققه وتجدد إيمانه ونوره خذ بأسباب الخشوع .. وقبل ما تصلي برضو، اقف قدام المراية وظبط لبسك كدة وشمه واتأكد من نضافته وحط عطر جميل(2)، وفـ إيدك السواك بتاعك طبعا، إوعى تهجر سنة حبيبك صلى الله عليه وسلم إللي فضل متمسك بيها طول حياته ولحد سكرات الموت عشان ينبهك ويوصيك أد إيه مهمة وبيحبك تعملها.. طب إنت عارف إنك لو نضفت سنانك بالسواك وقمت تصلي، المَلَك بيقوم معاك يقف وراك يسمع لقراءتك، ويقرب منك لحد ما ياخد كل القرآن إللي خارج من بؤك على جوفه مباشرة! طهر فمك بقى للقرآن يا مؤمن بما يليق بمقام الملائكة...(3)

كل دة بنستعد للصلاة؟! طبعًاااا.. دي أهم مقابلة فـ يومك وليلتك..
يلا ساوي الصفمع إللي جنبك زي ما الملايكة بتعمل.. واقفل الفتحات إللي بينكم كويس عشان الشياطين ماتعرفش تدخل توسوس وتسرق حاجة من صلاتكم(4)، ولما تبدأ فـ الصلاة افتكر تركز نظرك على مكان السجود يا عبد الله، و ركز إنك ما تتلفتش يمين وشمال عشان ربنا ما ينصرفش عنك(5)، وابقى تخيل نفسك قدام الكعبة مباشرة قبلة المسلمين، وربنا ناظر إليك.. والجنة على يمينك.. وإنت واقف على الصراط الرفيع أوي دة.. وافتكر كويس إن جهنم تحت الصراط.. وملك الموت وراك مستنيك تخلص صلاتك عشان يقبض روحك.. والرسول صلى الله عليه وسلم بيتفرج على صلاتك.. تخيل يا مسلم إنها آخر صلاة ليك.. وافتكر إنك لما تخلصها، تفضل قلقان هي اتقبلت ولا لأ أصلا... ! هو المسلم كدة دايما بين الخوف والرجاء..

وافتكر كويس إن أي شيء هتبقى قلقان عليه وإنت في الصلاة أوشايل همه هو أصلا بإيدين ربك إللي إنت بتصلي بين إيديه، عشان كدة اتوكل عليه سبحانه.. و اخشع... وفضي قلبك تماااامًا من أي هم ولو بسيط: "يعني مثلا البرنامج إللي إنت خايف يفوتك----ربنا هو إللي دلَّك عليه ويسَّر لك متابعته أصلا.. إنت ممكن تكروت الصلاة بسرعة عشان تلحقه ثم تلاقي النور قطع!.. طب التليفون إللي خايف يسكت وما تلحقش ترد على صاحبك ربنا هو إللي خلاه يرن.. إنت ممكن تكروت الصلاة بسرعة وبرضو تيجي ترد تلاقيه قفل!... بتحصل... السلعة إللي خايف إن المحل يقفل أو حد يسبقك ويشتريها قبلك ربنا هو إللي هيحفظهالك لو هي رزقك".. كوووول دة رزق بيد من تقف بين يديه.. ربنا قال عن الصلاة: {وَاصْطَبِرْ عَلَيْهَا لَا نَسْأَلُكَ رِزْقًا نَّحْنُ نَرْزُقُكَ}[طه:132]

طب عارف إن ربنا يسرلك الصلاة نفسها جدا؟ ربنا سبحانه عمل لك رخص عشان الصلاة عمرها ما تبقى تقيلة على قلبك.. مش بس كدة، دة سبحانه بيحب إنك تعمل رخصه دي وتستمتع برحمته.. عندك الصلاة في النعل مثلاً----مش في الشارع بس!.. عندك المسح على الجورب مثلاً---مش في البرد بس! أبدًا والله.. اتعلم إنت بس شروطهم وموانعهم وتابع نفسك لحد ما تتعود على خمس مسحات فقط في غير السفر، مش 47 مسحة يا مؤمن :D اتق الله.. كمان مفيش مانع من الوضوء بالمية الدافية ساعات كدة، بس بلاش تتعود على كدة على طول عشان النبي صلى الله عليه وسلم وصانا بالخشونة عشان النعيم والنعمة مش بيدوموا، النبي صلى الله عليه وسلم عاوزك تبقى مجاهد قوي صلب ثابت تتحمل كل حاجة وكل الظروف.. مش طري ونيّ واخد على النعيم

بدأت الصلاة خلاص آهو؟ الحمد لله... آه والله... نعمة تستحق الحمد بقلب مذهول من السعادة، أن مكنك الله من الوقوف بين يديه..
حط إيدك بقا اليمين عالشمال.. دي وقفة الأدب قدام ملك العالمين سبحانه.. تأدب.. عشان الله أكبر..
بلاش تفرك كتير في الصلاة.. عارف سيدنا عمر قال إيه عن إللي بيفرك كتير في الصلاة؟ قال عنه: "لو خشع قلبه لخشعت جوارحه"....
ركز تخشع ..

ابدأ يلا بالفاتحة.. طب عارف قصة الفاتحة؟ وإنها مقسومة نصين بيننا وبين ربنا؟ وإن ربنا بيرد على كل آية؟ جربت تركز في الفاتحة وإنت بتقراها بالمعنى دة وتتخيل الحوار الجميل أوي دة؟! تقول الحمد لله رب العالمين، ربنا يرد عليك "حمدني عبدي". تقول الرحمن الرحيم، ربنا يرد عليك "أثنى عليّ عبدي". تقول مالك يوم الدين، ربنا يرد عليك "فوّض إليّ عبدي". وتكمل لحد آخر السورة وربنا يرد عليك برضو "هذا بيني وبين عبدي ولعبدي ما سأل"، فيه إيه في الدنيا يا مسلم أحلى من كدة(6).

طب عارف معنى المغضوب عليهم ولا الضالين؟ لو عرفت معنى الفاتحة كلها هتعرف إن كل الدين تقريبًا جواها.. وهتحبها أوي.. وهتفرح بصلاتك.. وهتتغير حياتك بجد إن شاء الله.. و خد بالك من "خنزب"، حرامي الصلاة الخبيث، واطرده بالخشوع عشان يرجع مفلس ماعوش حاجة مسروقة من صلاتك(7).

دة الصلاة دي من آخر الحاجات إللي حبيبك النبي صلى الله عليه وسلم وصّى المسلمين عليها وهو بيموت، في عز ما كان بيتصبب عرقًا من أثر سكرات الموت قعد ينبه المسلمين عليها كتير: "الصلاااااة.. الصلاااااة..." معقولة تضيعها!

اركع واسجد يلا..
في الركوع حقق حروف التسبيح والاستغفار ببطء وسكينة وصوت لا عالي ولا واطي، عشان تمررها على قلبك وتغسله.. -همس مسموع لا أكثر: {بَيْنَ ذَلِكَ سَبِيلًا} (8).. استحضر زلاتك وعثراتك وأخطاءك وانت بتستغفر، مع التسبيح المعروف طبعًا..

وفي السجود برضو، حقق حروف التسبيح بالراحة وحس بالسكينة في حركاتك وكلماتك، وطوّل في السجود.. دة أقرب مكان بنكون فيه من ربنا.. طوّل بقا وادعي بكووول إللي نفسك فيه.. وياريت كل دعاويك تكون أخروية لإنك مسلم مؤمن بالغيب وتحمل هم الآخرة على الدوام.. وما تنساش تدعي لنفسك تحفظ القرآن وتفهمه وتعرف تبلغه، وطوّل في الركوع كمان ما تخطفهوش كدة.. إنت عارف إنك أول ما بتركع أو تسجد، كل ذنوبك الباقية إللي ما نزلتش قبل الصلاة مع ماء الوضوء، بتتحط فوق كتافك وطول ما إنت راكع وساجد تفضل الذنوب دي تتساقط عن عاتقك بإذن الله!(9). عشان كدة الصلوات الخمسة كفارات لما بينهن لو ما إنت ما عملتش كبائر إن شاء الله.. خد بالك بقا.. أعني على نفسك بكثرة السجود.

جينا للتشهد بقا.. طب عارف معنى التشهد؟ عارف أهميته عند النبي صلى الله عليه وسلم؟ طب عارف إن النبي علمه لسيدنا عبد الله بن مسعود وهو ماسك كفه بين إيديه الشريفة صلى الله عليه وسلم -يا بختك يا سيدنا عبد الله-! وكان كإنه صلى الله عليه وسلم بيعلمه سورة من القرآن مش كلام عادي -زي ما جه في الحديث! طب عارف إنك لما تقول "السلام علينا وعلى عباد الله الصالحين" إنك كدة سلمت على كل العباد الصالحين في الأرض... الله عالصلاة(10)

تمم حركات وهيئات الصلاة كلها.. أتم القيام.. وأتم الركوع.. وأتم الجلوس... اطممممن في صلاتك.. زي ما قال حبيبك صلى الله عليه وسلم "حتى تطمئن..."..  اعمل هيئة الصلاة النبوية بالظبط "صلوا كما رأيتموني أصلي"، اشتري كتيب محقق عن هيئة صلاة النبي، واقرأه وطبق منه كل يوم جزء لحد ما تتقنها زي اسمك.

خلصت صلاة خلاص بفضل الله ورحمته؟
استشعر عظمة النعمة إللي ربنا مكنك منها وحرم منها ناس تانية.. نعمة الصلة بالله والطمأنينة بذكره والفرار من الدنيا إلى الصلاة.. وابتسم ابتسامة رضا وفرحة كبييييرة وإنت لسة قاعد عالأرض وقول لنفسك: "الله عالراحة والجمال.. قلبي فرحاااان بجد وبيبتسم زيي.. له حق حبيبنا النبي صلى الله عليه وسلم يقول الصلاة دي حب حياته وقرة عينه.. حتى لو هتتصنع دة، استمر---هتتبرمج بالتكرار إن شاء الله.. وهتحس فعلاً بحجم النعمة مع المجاهدة والتكرار..

صمم جدول أسبوعي لنفسك بمواقيت الصلاة بالساعة بالظبط، وحط خمس خانات مثلاً لكل فرض 1/النضافة والطهارة، 2/الصلاة على وقتها، 3/إتمام الحركات، 4/عدم الحركة كتير، 5/أداء سُننها قبل وأثناء وبعد الصلاة، لكل فرض بالترتيب، وكل خانة في الخمسة دول تاخد علامة بلون مختلف لو اتعملت.. وتعد العلامات آخر الأسبوع ،وتشوف أكتر لون متحقق في الجدول وأكتر لون ناقص عندك -ارتباط ذهني بالصورة مهم ليك جدًا-.. وخلي الجدول القديم محطوط جنب الجدول الجديد عشان يبقى عندك حافز للتحسن.. وفكر نفسك دايمًا إن الجدول دة هيبقى فيه واحد زيه في صحيفتك إللي هتمسكها فـ إيدك يوم القيامة.. ربنا يجعل فيها ما يسرك.

في حالة إنك صليت لوحدك مثلاً، ولقيت نفسك لكلكت الصلاة، اقعد مع نفسك وأدبها وقول لروحك: "عارف النبي صلى الله عليه وسلم قال إيه على صلاتك دي بالظبط؟! قال إنها نقر زي نقر الغراب للأرض!.. طب عارف النبي عمل إيه مع إللي صلى زيك كدة؟ خلاه يعيد الصلاة كذا مرة لحد ما صلى عدل!.. يلا يا مؤمن ارجع فصلِّ فإنك لم تصلِّ".

طب بتتأخر ساعات عن الصلاة؟ ليه تتأخر عن الصلاة بعد الأدان وتسيبها لحد الصلاة إللي بعديها؟! كدة تتأخر على أكتر عمل ربنا بيحبه "الصلاة على وقتها".. قوم استغفر يلا واستغيذ من إبليس وصلي.. لعل ربنا يمسحلك التأخير دة ويكتبك من السابقين المسارعين في طاعته... أتبع السيئة الحسنة تمحها.

بتسيب صلاة الجماعة ساعات؟ يا خبررر! بقا معقوووول حد عاقل يخيروه إن صلاته تتكتب مرة واحدة ولا 27 مرة، يقوم يختار بكامل إرادته إنها تتكتب مرة واحدة! ياااا مؤمن قوم استعيذ  اتصل بخالقك و  صل.. ويا سلام لو تغلب شيطانكوتنزل تصليها جماعة في المسجد بيت أكرم الأكرمين عز وجل، تبقا فزت بأوسع كرم ضيافة شافه بني آدم.. إوعى تفوت ضيافة الرحمن لحبايبه في بيته عز و جل، مش هتلاقي أبدًا يا مسلم حد في كرمه سبحانه.. الكريم .. ضيوف الرحمن

أنا مش هضحك عليك وأقولك إن الصلاة جماعة في المسجد فرض قولا واحدا، لأ.. حكم الصلاة في المسجد فيه خلاف معتبر، كلنا عارفين وأكيد إنت كمان عارف.. لكن يا مسلم: المسلم الحق متبع لكل الطاعات الثابتة بغض النظر عن حكمها.. كفاية أوي للمسلم الحقيقي إنه يعرف إن ترك الصلاة في المسجد شيء بيحزن النبي جدًاااا لدرجة إنه صلى الله عليه وسلم كان بيتمنى يجيب حد يقف مكانه في صلاة الجماعة عشان يروح هو على الرجال إللي بيصلوا بلا عذر في البيوت عشان يولع في بيوتهم نار عليهم وهما فيها!!.. إزاي قابل دة على نفسك ... وكفاية أوي للمسلم الحقيقي إنه يعرف إن الناس كلها يوم القيامة خارج ظل عرش الرحمن -يوم تدنو الشمس الملتهبة من الرؤوس- إلا سبع أصناف من البشر، من ضمنهم رجل قلبه معلق بالمساجد.. الكلمتين دول كفاية عند إللي بيحب ربنا بجد..

وأخييييرًا...
إوعى تكون مش بتصلي أصلا!!..

لازم تعرف إن أول حاجة هتتحاسب عليها هي الصلاة.. لو فسدت، يبقى باقي عملك الصالح فسد ودفتر أعمالك الصالحة مش هيتبص فيه أصلا(11)؛ لازم تعرف إن السنن الرواتب عشانك إنت مش عشان حد تاني، لإن إللي ناقص من صلاتك إنت ينجبر بالسنن بتاعتك إنت.. ومين فينا صلاته كاملة!

لازم تعرف إن الصلاة عمود الخيمة الكبيييرة.. هات ملاية كدة وحط تحتها عصاية واقفة، وشيل العصاية وإنت تشوف إزاي البناء بينهار من غير العمود.. من أقامها فقد أقام الدين.. ومن هدمها فقد هدم الدين.. وكل ما توقع الصلاة افتكر تقول لنفسك: "بتهد الخيمة كلها كدة على دماغك يا مجنون اعقل و صل  واخشع ...

لازم تعرف إن ديننا خلا الصلاة حل لكل المشاكل: عندك حيرة---فيه صلاة الاستخارة.. عندك طلب---فيه صلاة الحاجة.. عندنا كسوف للشمس مرعب---فيه صلاة للكسوف.. عندك صدقات أد كدة لازم تؤدي حقها----فيه صلاة الضحى تتصدق بها عن كل مفصل في جسمك يوميًا.. عندك جفاف في البلد والمية شحيحة----فيه صلاة استسقاء لجلب الأمطار برحمة ربنا.. عندك قلب تعبان----فيه صلاة قيام تروق البال وتصفي النفوس وتغسل القلوب..

لازم تحس بالفخر من إن ديننا الدين الوحيد إللي المسلمين فيه بيتصلوا بخالقهم خمس مرات في اليوم، وإللي يزود اتصاله بسنن زيادة أكييييد هو الكسبان.." {وَمَنْ يَبْخَل فَإِنَّمَا يَبْخَلُ عَنّ نَفْسِهِ*وَاللهُ الْغَنِيُّ وَأَنْتُمْ الْفُقَرَاءُ} [محمد:48].

وصدق من قال: "عجبت لمن يبحث عن السعادة وعنده خمس صلوات في اليوم والليلة"

إلا صلاتك...

**هذامقال استخلصته من مقالي التربوي أولادنا والصلاة هنا على الموقع، نسقت هذه النسخة حتى تكون خطابا مباشرا مناسبا للجميع، عن أسباب عملية لل "خشوع في الصلاة"**

الهوامش:

(1 )ليس بحديث ولكن قول للحسن البصري: "من أراد أن يكلمه الله فعليه بالقرآن -على اعتبار أنه كلام الله- و من أراد أن يكلمه الله فعليه بالصلاة -على اعتبار الحديث القدسي «قسمت الصلاة بيني وبين عبدي نصفين ولعبدي ما سأل، فإذا قال العبد الحمد لله رب العالمين قال الله حمدني عبدي...» إلخ".

(2 )لا يهم كون العطر بكحول أو غير، لأن الخلاف قائم حول نجاسة الكحول عينًا، فالبعض يراه عين نجسة في ذاته فلا بد من تطهير الثوب منه و الجسد عند الصلاة، والبعض لا يراه عينًا نجسة وبالتالي لا يبطل الصلاة.

(3) عن علي رضي الله عنه أنه أمر بالسواك وقال: قال رسول الله صلى الله عليه وسلم: «إن العبد إذا تسوك ثم قام يصلي قام الملك خلفه فيستمع لقراءته فيدنو منه –أو كلمة نحوها– حتى يضع فاه على فيه فما يخرج شيء من القرآن إلا صار في جوف الملك فطهروا أفواهكم للقرآن» (حسن إسناده المنذري في صحيح الترغيب والترهيب:215).  

(4) روى البخاري ومسلم وابن أبي شيبة عن ابن مسعود رضي الله عنه قال: "علمني رسول الله صلى الله عليه وسلم التشهد، وكفي بين كفيه، كما يعلمني السورة من القرآن: «التحيات لله والصلوات والطيبات، السلام عليك أيها النبي ورحمة الله وبركاته، السلام علينا، وعلى عباد الله الصالحين -فإنه إذا قال ذلك أصاب كل عبد صالح في السماء والأرض- أشهد أن لا إله إلا الله، وأشهد أن محمداً عبده ورسوله»".

(5) في الحديث الذي صححه الألباني: «أقيموا الصفوف، وحاذوا المناكب، وسدوا الخلل –الفتحات-، ولينوا بأيدي إخوانكم، ولا تذروا فرجات -فتحات- للشيطان، ومن وصل صفًا وصله الله، ومن قطع صفًا قطعه الله»، وفي حديث مسلم: «ألا تصفون كما تصف الملائكة عند ربها؟» فقلنا يا رسول الله وكيف تصف الملائكة عند ربها؟ قال: «يتمون الصفوف الأول -بضم الهمزة جمع الأول بفتح الهمزة-، ويتراصون في الصف».

(6) قال رسول الله صلى الله عليه وسلم: «قسمت الصلاة بيني وبين عبدي نصفين ولعبدي ما سأل، فإذا قال العبد: الحمد لله رب العالمين، قال الله تعالى: حمدني عبدي، وإذا قال: الرحمن الرحيم، قال الله تعالى: أثنى علي عبدي، وإذا قال: مالك يوم الدين، قال: مجدني عبدي، وقال مرة: فوض إلي عبدي، فإذا قال: إياك نعبد وإياك نستعين، قال: هذا بيني وبين عبدي ولعبدي ما سأل، فإذا قال: اهدنا الصراط المستقيم، صراط الذين أنعمت عليهم، غير المغضوب عليهم ولا الضالين، قال: هذا لعبدي ولعبدي ما سأل»، وفي رواية: «قسمت الصلاة بيني وبين عبدي نصفين، فنصفها لي ونصفها لعبدي» (رواه مسلم وأصحاب السنن الأربعة).

(7) خنزب هو اسم شيطان خبيث عدو الخشوع في الصلاة.. جاء في الحديث الذي رواه مسلم أن عثمان بن أبي العاص أتى النبي صلى الله عليه و سلم فقال: "يا رسول الله إن الشيطان قد حال بيني و بين صلاتي، وقراءتي يلبسها علي، فقال رسول الله صلى الله عليه و سلم: «ذاك شيطان يقال له خنزب، فإذا أحسسته فتعوذ بالله منه واتفل على يسارك ثلاثًا»، قال: ففعلت ذلك فأذهبه الله عني"...

(8) {وَلَا تَجْهَرْ بِصَلَاتِكَ وَلَا تُخَافِتْ بِهَا وَابْتَغِ بَيْنَ ذَٰلِكَ سَبِيلًا} [الإسراء من الآية:110].

(9) في الحديث الصحيح: «إن العبد إذا قام للصلاة أُتِيَ بذنوبه كلها على عاتقيه، فكلما ركع أو سجد تساقطت عنه».

(10 )من حديث حسن.

(11) ورد في الحديث الصحيح: «أول ما يحاسب به العبد يوم القيامة من عمله صلاته، فإن صلحت فقد أفلح وأنجح، وإن فسدت فقد خاب وخسر، فإن انتقص من فريضته شيء، قال الرب عز وجل: انظروا هل لعبدي من تطوع فيكمل بها ما انتقص من الفريضة، ثم يكون سائر عمله على ذلك». ومن معاني الحديث أن تارك الصلاة لا يقبل منه أي عمل صالح، حيث جاء في إحدى روايات الحديث: «فإن قبلت منه قبل سائر عمله، وإن ردت عليه رد سائر عمله». وقد ذكر هذه الرواية الألباني في الصحيحة: «أول ما يحاسب عليه العبد يوم القيامة الصلاة فإذا صلحت صلح سائر عمله وإذا فسدت فسد سائر عمله» (من المجلد:1-3 موسوعة الدرر، (2/240) برقم 1859، وصححه الشيخ الألباني في الصحيحة برقم:1358).
 

المصدر: خاص بموقع طريق الإسلام

أسماء محمد لبيب

كاتبة مصرية

  • 12
  • 2
  • 10,439

هل تود تلقي التنبيهات من موقع طريق الاسلام؟

نعم أقرر لاحقاً