سفاهة
يحلف على زوجته بالطلاق لأتفه الأسباب ولو اتنفرذ أو حد ضايقه من عيلتها برضه يحلف يمين طلاق بالتلاتة إنها تقطع رحمها وما تعتبش بيتهم وممكن عشان يقنع أي حد بأي حاجة برضه يحلف مائة يمين طلاق
عليه الطلاق
طلاق تلاتة
تبقي طالق بالتلاتة لو عملتي كذا أو سويتي كذا
تحرمي عليه لو روحتي كذا
وهكذا وهكذا
وبعد كل الطلاقات اللي زي اللبانة في بؤ سيادته يجيلك المرة التالتة أو الرابعة أو العاشرة وهو باصص في الأرض ويقولك بكل بساطة: شوف لي حل يا عم الشيخ
معلش أصل ما كانش قصدي
والأعجب منه اللي مش عايز يدور على شيخ أصلا وآخره يبعت حد أو يخلي المسكينة تدور على إجابة مشكلته هو على آسك ولا فيس بوك ولا باتصال تليفوني على برنامج فتاوى على أي قناة
يعني بعد استخفافه بذالك الميثاق الغليظ واستهانته بحدود الله وإهانته لزوجته بهذا الشكل المفرط وظنه الباطل أن الحلف بالطلاق والطلاق المعلق هو حقه الطبيعي في الحياة... بعد كل ده مش هاين عليه حتى يتعب نفسه شوية ويهز طوله عشان يصلح سفهه المتكرر
لا يا عزيزي
مش هينفع كدة
حدود الله ومواثيقه مش هزار ولا لعبة ولا مجرد سوط بتجلد بيه زوجتك لما تضايقك
ولما سيادتك تغلط وتستخف بالأيمان بهذه الطريقة يبقى أقل شيء تتعب نفسك وتدور على حل بنفسك مش تبعت حد يدورلك أو تكتفي بضغطة كم زرار على الموبايل ولا اللابتوب
ده ميثاق غليظ
آية ربنا ذكرها بين آيات خلق السماوات والأرض وخلق الناس من تراب
آية الزواج
كفايه سفه بقى...
- التصنيف: